Buku Anyar

Puji sukur mring Allah SWT kang wus paring kanugrahan tan kawilang. Sawise meres pikir sawetara suwene saperlu ngolah tetembungan ngrakit ukara wusanane kasil uga ngrampungake buku kumpulan geguritan asesirah "Mata Biru " kang diterbitake dening "Fire Publisher" iki. Laire buku iki minangka kado lan pengetan  ulang tahun anak-anakku kinasih lelorone, Inez lan Alda. Kanthi pangajab bocah-bocah ora wegah lan tansah ngudi ilmu kawruh kanggo ngundhakake lan njembarake pamikir lan pamawas.
Senajan isih akeh kekurangan ing kana kene awit cupeting kawruh lan cetheken sesurupan, dakajab buku iki minangka pambuka lan sumusul laire karya kreatif liyane.
Buku iki awujud kumpulan geguritan kang isine nyritakake sawernaning lelakon urip ing bebrayan. Minangka wanita, garwa, guru, asmara lan crita liyane. Pamrayoga lan panyaruwe daktunggu amrih sampurnane karya iki bacute. Matur nuwun.

Kelasku

Suplemen : Tembung entar

Saben dina daksaba daksapu

Bangku meja tinata

Para siswa sumedya

Sinau

Amrih dadi bocah kang landhep  pikire

Jembar kawruhe

Tan ana kang kuciwa

Tan ana kang sambat

Pinaringan tugas PR akehe ora mekakat

Ora ana kang dawa tangane

Ora ana kang gedhe endhase

Wiwit saka omah gedhong gubug penceng pinggir kali

Kabeh nyawiji

ngangsu kawruh nggayuh impen sundhul langit

gawe arum lan kuncara asma wong tuwa lan nagara

dadi kembang lambe lan kusumaning bangsa

kawiwitan saka kelasku*

KEMBANGE PANGURIPAN

tresna

bisa ngundhakake lan nikelake samubarang rasa

duhkita

cuwa

turida

duhkita kang dadi kembanging panguripan

daksuwun kaya sepur kang playune pindha dioyak setan

enggala mrangguli stasiun

ganti gumanti penumpang lan bakul asongan

cuwa kang dadi kembanging panguripan

dakajab ora lestari sumimpen primpen

bisaa kaya banyu kali

mili..............

turida kang nggedhor-nggedhor dhadha iki

daksuntak mawa reroncening kekembangan  rerakiting tetembungan

supaya sliramu ngerti

aku ora kuwawa nandhang lan nyandhang

tresna kang kosawurake biyen kae

ngrembuyung  tumeka dina iki

asmaradana kang kotembangake lamat lamat

saya cetha keprungu ing kupingku

muga ora nuwuhake dahuru

mring  aku 

mring sliramu *

6. Jendhela

Ing akasa gumebyar kartika

Cumlorot pamer cahya

Janma limpad bisa marak seba mrana

Ing samodra jumlegur ombak mbandul baita

Aku lan sliramu bisa slulup gegojegan lawan mina

Tekan dhasar apa sungapan blaka

Thelenging nala nora bisa

Digrayangi sepira jero apa amba

Liyan datan mangerteni suka sungkawa

Lega apa kuciwa

Yen ora kababar utawa kawedhar

Sarana blaka utawa lumantar pralampita

Kabeh sarwa samar

Awit netra minangka jendhela wardaya,

Dumunung ing papan liya*** 220309

pepanggihan

pepanggihan dina iki
ketemu mitra kadang nunggal sawah lan pategalan
amung winates galeng lan kalenan
bebarengan macul ngarit nyebar winih
sinambi kekidungan lan dedonga mring pangeran
bisaa thukul trubus nengsemake
mbiyut wohe
eyub wite
bisa kanggo nyukupi sandhang pangan
bisa dadi papan pangayoman
bisa dadi apa bae
migunani lan murakabi soksapaa kang mbutuhake
@ para kadang dwija ingkang nembe ngayahi jejibahan mirunggan UN ing pawiyatan

Geguritanku

1.Tilas


ana tilas dwija
ana tilas siswa
saiki dadi bupati apa mentri

ana tilas kyai
ana tilas mucikari
obah osiking ati kang ngubengake Gusti

ana tilas garwa
ana tilas maratuwa
crah amarga ana prahara

tan ana tilas : atmaja
tan ana tilas : ibu rama
tan ana tilas : tresna
sakabehane isih ana
salawase tetep ana
sanajan lingsir surya sasangka warsa***250591


2. kere

rujak senthe lungsed minangka tendha
pangeyub angga
nalika beras wutah tempolong bolong bathok mlumah
dadi ajang
yen saben dina kaya ngene
mokal sida mukti urip mengkone ***250591



3. KANGGO ANAKKU WADON

Ndhuk
Ing kana Kyai Subkhi wis tata – tata
Soundsystem sajadah klasa digelar amba
Ulem
Para kawula enggal sowan mring Sing Kuwasa
Apa kowe ora krungu ?
Enggal lungakna
Hello kitty kang kokekep ing dhadha
Apa biyungmu kudu miscall kowe
Supaya cekat ceket tumandang gawe ?
Aja
Aja dadi korban teknologi
lakoni jejibahanmu linambaran ati suci
amrih minulya uripmu tembe buri***
smg 11 des 2008
***

4. Kanggo : Sliramu 1

Carange garing
Pange aking
Godhonge rontok
Kembange gogrog

Nanging empole isih tumancep
Udan wingi trubus
Ngrembaka
Katrajang lesus
*** 28 02 09



Saka : Sliramu 1
Dening : Sliramu

Dina iki udan riwis riwis
Trubuse saya ledhung
Trubus ora katrajang lesus
Dina iki kasiram udan riwis riwis
Apa bisa ngrembaka ?

***



5.Kanggo : Sliramu 2

Kembang mawar
Thukul ing tlatah cengkar
Kurang rabuk kurang tirta kurang sunar
Mung tetesing bun kang ajeg teka
Ora sepiraa
Tan bisa ngrembaka
Tan bisa tumangkar
Kari ngenteni praptane ajal
Najan mangkono arane mawar
Gandane panggah amrik angambar



Sumurupa
Mawar kuwi mapane ing puri
Kinupeng pager kawat ri
Juru taman asikep gegaman tansah waspada
Siyaga mring sakeh bebaya***110309



Saka : Sliramu 2
Dening : sliramu


Apa kang bisa daktindakake
Amrih amrike ora muspra ?




6. Kanggo : Sliramu 3

Sliramu pirsa
Melati ing taman sari kana
Butuh kawigaten lan upakara
Ora kalah arum karo mawar ing kene
Sing beda mung warnane.***110309